iStock Photo Getty Images +
Il-ġurnalisti għandhom ikunu jistgħu jaħdmu liberament u b’mod sikur — dan jinsab fil-qalba tal-valuri u d-demokraziji tal-UE. Il-ġurnalisti ilhom jiffaċċjaw għadd dejjem akbar ta’ attakki matul dawn l-aħħar snin. Huwa għalhekk li l-Kummissjoni Ewropea ħadet azzjoni konkreta u għamlet il-protezzjoni tal-ġurnalisti waħda mill-elementi ewlenin tal-leġiżlazzjoni tagħna dwar il-midja, li wħud minnhom diġà daħlu fis-seħħ il-ġimgħa d-dieħla.
Nhar it-Tnejn, 6 ta’ Mejju, ir-regoli l-ġodda kontra l -Kawżi Strateġiċi Kontra l-Parteċipazzjoni Pubblika (SLAPPs) ser jidħlu fis-seħħ, u jipprovdu lill-ġurnalisti u lid-difensuri tad-drittijiet tal-bniedem b’għodod biex jiġġieldu kontra proċedimenti abbużivi fil-qorti. Nhar it-Tlieta, 7 ta’ Mejju, il- Att Ewropew dwar il-Libertà tal-Media se jidħol fis-seħħ ukoll, u se jġib salvagwardji addizzjonali dwar l-indipendenza editorjali, il-pluraliżmu tal-media, it-trasparenza u l-ġustizzja u kooperazzjoni aħjar tal-awtoritajiet tal-media permezz ta’ Bord Ewropew tal-Media ġdid. Dawn l-inizjattivi huma parti minn strateġija Ewropea komprensiva għall-midja, li tibni fuq il- Pjan ta’ Azzjoni għad-Demokrazija Ewropea u l- Pjan ta’ Azzjoni Medjatiku u Awdjoviżiv (MAAP). Barra minn hekk, il-Kummissjoni ppubblikat studju, li juri l-progress fl-Istati Membri tal-UE biex jimplimentaw ir- Rakkomandazzjoni tal-Kummissjoni dwar il-protezzjoni, is-sikurezza u l-għoti tas-setgħa lill-ġurnalisti.
Il-Viċi President għall-Valuri u t-Trasparenza, Věra Jourová, qalet: “Illum nagħtu ġieħ lill-ġurnalisti u lill-ħaddiema tal-midja kollha li jinfurmawna, xi kultant fir-riskju ta’ ħajjithom. Huwa d-dmir tad-demokraziji li jipproteġuhom. Fl-UE, għaddejna liġijiet mingħajr preċedent, bl-Att dwar il-Libertà tal-Media u Direttiva biex niġġieldu l-litigazzjoni abbużiva kontra l-ġurnalisti. Nappellaw lill-Istati Membri biex jimplimentaw dawn ir-regoli malajr kemm jista’ jkun. Il-Kummissjoni se tkompli bl-isforzi tagħha biex tgħin tindirizza l-isfidi li qed jiffaċċjaw il-midja, inkluż fir-rigward tas-sostenibbiltà ekonomika tas-settur tal-midja”. Il-Kummissarju għas-Suq Intern, Thierry Breton, żied jgħid: “L-iżgurar li l-ġurnalisti jkunu jistgħu jwettqu l-ħidma tagħhom f’xenarju tal-media b’saħħtu huwa vitali għad-demokraziji tagħna. Bid-dħul fis-seħħ tal-Att dwar il-Libertà tal-Media l-ġimgħa d-dieħla, dan il-Jum Dinji tal-Libertà tal-Istampa sab li l-UE hija mgħammra aħjar minn qatt qabel b’sett ta’ għodod impressjonanti għall-ħarsien tal-indipendenza u l-pluraliżmu tal-media.” Ilbieraħ, ir-Rappreżentant Għoli/Viċi President Josep Borrell ħareġ dikjarazzjoni f’isem l-UE.
Tista’ tiċċekkja wkoll il-politiki, il-finanzjament u l-leġiżlazzjoni tal-UE dwar il- libertà u l-pluraliżmu tal-midja.
Tista’ tkun interessat li tesplora l- “Inizjattiva l-Ġdida” tal-UE u kif l-UE għandha l-għan li tipproteġi l-libertà u l-pluraliżmu tal-media.