Déanann an grúpa athbhreithniú agus plé ar bheartais maidir leis an oidhreacht chultúrtha dhigiteach agus ar an tionscnamh atá ar na bacáin maidir le spás coiteann sonraí Eorpach. Thairis sin, cuirfidh an sainghrúpa comhairle ar fáil agus cuideoidh sé le faireachán a dhéanamh ar chur chun feidhme an Mholta maidir le spás coiteann sonraí Eorpach don oidhreacht chultúrtha a glacadh an 10 Samhain 2021. Tagann an grúpa saineolaithe i gcomharbacht ar an Sainghrúpa maidir leis an Oidhreacht Chultúrtha Dhigiteach agus Europeana (DCHE). Áirítear cúraimí nua sa sainordú don ghrúpa maidir leis an Spás Coiteann Sonraí Eorpach don Oidhreacht Chultúrtha a fhorbairt, chomh maith le naisc bhreise le spásanna sonraí eile faoin gClár don Eoraip Dhigiteach (DIGITAL). Ní shainítear fad shainordú an ghrúpa, ach is é an clár DIGITAL a chinneann é.
Tá ionadaithe ceaptha ag gach ceann de 27 mBallstát an Aontais chun páirt a ghlacadh sa ghrúpa, agus UNESCO mar bhreathnóir.
Is é is bunús dlí don Ghrúpa nua Cinneadh C(2021) 4647 ón gCoimisiún an 29.6.2021 lena mbunaítear Sainghrúpa an Choimisiúin maidir leis an Spás Coiteann Sonraí Eorpach don Oidhreacht Chultúrtha agus lena n-aisghairtear Cinneadh C(2017) 1444.
Bíonn cruinnithe an Ghrúpa ar siúl faoi dhó sa bhliain agus tá an clár oibre agus na miontuairiscí ar fáil ar líne.
Foghrúpa ina bhfuil Saineolaithe Neamhrialtasacha
Tá cinneadh déanta ag an gCoimisiún foghrúpa a chur ar bun ina mbeidh saineolaithe neamhrialtasacha chun scrúdú a dhéanamh ar ghnéithe sonracha a bhaineann le caighdeáin dhlíthiúla agus theicniúla i ndáil le forbairt an spáis choitinn sonraí Eorpaigh don oidhreacht chultúrtha.
Cuireadh bailchríoch ar an nós imeachta roghnúcháin agus cuirfidh an grúpa tús lena chuid oibre ag tús 2023.
Cuirfeareolas faoi bhaill agus obair an ghrúpa ar fáil ar líne.