Navighendu annantu à u web : Imprestami le to capre...
Navighendu annantu à u web, s’ella vi piaci a paghjella ma chì vo n’eti una techja di cantà sempri i listessi parolli, pudareti truvà più di 300 paghjelli scritti annantu à u situ paghjella.com. A scelta po ci hè !
Sì no pigliemu a lettara « i » par isempiu, ci scuprimu una di i più cantati chì principia dicendu « Imprestami le to ale, a mio ghjallinuccia nera… » Ma in la cronaca d’oghji, chì ci faci viaghjà fin’è l’Ingliterra, cantaremu piuttostu « Imprestami le to capre… ». Quand’e v’avaraghju spiigatu tuttu, tandu, vi daraghju a seguita…
D’aprili scorsu, duranti u prima cunfinamentu, una pastora inglesa avia dicisu di prupona un sirviziu bellu orighjinali à quilli chì passavani i so ghjurnati di travagliu in visiocunfarenza ma ancu à l’amichi chì si faciani i so apperitivi a sera annantu à Zoom…
Posta ch’ella ùn pudia fà visiti pidagogichi o organizà matrimonii ind’è ella, Dot McCarthy, pà fassi dui soldi, t’hà avutu l’idea di fà participà i so sgiotti à i visiò di quilli chì li dariani 5€. Una bella manera di fassi una risata è di scurdassi appinuccia di sta crisa sanitaria chì culpisci u mondu sanu…
Dopu à u so prima annunciu annantu à i reti suciali, hà ricivutu più di 200 dumandi da i so lochi fin’è i Stati Uniti passendu pà a Russia è ancu a China ! Da tandu, solu incù stu sirviziu quì, hà vintu più di 60000 auri ! Avà, una visiò cù una bella capretta british a ci faremu ancu noi è a dumanda a li scrivaremu cusì :
" Imprestami le to capre, a mio pasturella inglese
Ch’aghju da fà una visiò à la fine di u mese
Da falli discorre appena cù e sgiotte di u paese ! "