Navighendu annantu à u web : In China...
Navighendu annantu à u web, sta simana, ci n’andaremu in China chì vi vogliu cuntà a storia di dui donni : una chì hà incasciatu i soldi è l’altra chì l’hà persi…
In lu 2007, si scupria à i Stati Uniti è po in lu mondu sanu, u prima Iphone, u famosu teleffuninu d’Apple. 14 anni dopu, ni semu dighjà à u 12esimu chì com’è i so fratilloni, t’hà parechji virsioni. U 16 di farraghju, una chinesa avia dicisu di cumprassi l’Iphone 12 Pro Max pà 1300 auri.
L’hà cumandatu novu framanti annantu à u situ ufficiali d’Apple è calchì ghjornu dopu, l’hà ricivutu. Infini, hà ricivutu u pacchettu, ma quand’ella l’hà apartu, s’hè avvista chì u so Iphone era statu rimpiazzatu da un yaourt à a mela ! T’avia intaressu à essa bonu quissu quì !
Tandu, a vittima di ‘ssa scruccunaria hà spiigatu ciò chì l’era accadutu in un filmettu publicatu annantu à a reti suciali Weibo. Hè cusì ch’ella hè principiata l’inchiesta.
In fatt’è fini, era un impiigatu di a sucità di trasportu ch’avia arrubbatu u teleffuninu è chì in la so scatula, ci avia missu u yaourt ! S’ella avissi sappiutu, saria andata à pigliallu in un magazenu chì cusì po una surpresa com’è quissa, ùn l’avaria mai avuta !
Pà compia, sempri in China, vi vurriu parlà di Madama Wang : una donna chì hà purtatu u maritu in tribunali pà una raghjoni pocu cumuna in un prucessu : l’omu partia à travaglià è tandu, ùn l’aiutava micca pà i faccendi casani è pà accupassi di i figlioli.
U ghjudici, chì l’hà datu a raghjò, hà cundannatu l’omu à pagà 50000 yuan, veni à dì più di 6000 € ! Piombu !