Masai: U celu bleu
A differenza trà u celu bleu è u celu bleu bleu bleu...
Aspettanu di mè una analisa pulitica. Ma eo pensu à u celu bleu. A un celu bleu bleu bleu. Tè, mì... Chì differenza ci serà, trà un celu bleu è un celu bleu bleu bleu.
Ùmbè, ùn sò. À u principiu di issu Masai, ùn la vi saperebbi dì.
Ci pensu moltu più a u celu bleu, chì oghje u vecu neru. Aghju u murale à tappettu. Attualmente, voltanu in l’attualità trè circadori : l’Americanu Dennis Meadows, u Talianu Aurelio Peccei è u Norvegese Jorgen Randers. Specialisti mundiali di u clima, di l’ecunumia, scentifichi pianetarii chì m’ete capitu i caponi ch’elli sò. Andate nantu à Internet circate i so nomi è lighjite. S’elli ùn vi caccianu a voglia, ancu à voi, o s’elli ùn v’arrabbianu da lampà tuttu à gambe à l’aria, e mi tagliu.
Facciu per dì, benintesu.
Chì dicenu? Ind’è dicenu chì simu futtuti, ch’ùn vale a pena à turzunà. Hè ineluttabbile u crollu generale di l’ecunumia è di u nostru modu di campà. Malgradu l’avertimenti di i scentifichi, i vertici pulitichi mundiali di Tokyo, Copenhacu o Rio, ùn anu riesciutu à frenà u spogliu di e risorse di a pianeta è e mutazioni climatiche, nate da l’attività umane. Spiecanu chì, per via di l’assenza di reattività di i pulitichi, di u pesu di l’inerzia (chi allonga assai u tempu necessariu a mette in opera una riforma), ùn ne simu più à l’ora di u sviluppu duraticciu. L’avemu trapassata. Segondu issi vusiunarii, ghjè l’ecunumia di sopravivenza chì ci aspetta. Prima di a fine di issu seculu, emu da esse custretti di falla finita cù l’ecunumia di a crescita permanente, fundata nantu à a predazione di e risorse di a pianeta è a creazione di bisogni cunsumisti artificiali. Per Meadows, Peccei è Randers, issa revuluzione s’hà da impone à noi, dopu à una spezie d’implusione ecunomica è più largamente di civiltà.
Chì vulete analizà dopu à què? Chì vulete spiecà a strategia di l’unu è di l’altru pè e cantunali, e territuriali, la CAB, la CAPA, Francois Hollande, Sarkozy...
Face ride, emu u murale à tappettu. Chì ci n’enfuttimu. Emu un solu scopu puliticu. U celu bleu. Ma bleu bleu bleu.
Tè, mì chì vecu a differenza, avà….
** **