Masai : U trenu di Portivechju
Ci n'anu da vulè, puesie è canti....
Golu chì corre à l’aringuarciu
Teste o viote o à lampioni
Un presidente mezu marciu
A mo caccara in pantaloni
L’aghju vista incù i mo ochji.
Fiume Golu senz’illusioni
A mo caccara presidente
Teste viote in pantaloni
È a Corsica chì si pente
L’aghju vista incù u mo core
Ma
Portivechju incù u trenu
In doppia strada ferrata
Per godesi à lu serenu
Una felice viaghjata
Un l’aghju vista nè incù l’ochji nè incù u core
È quessa francadimente mi dispiace. Sò tanti i corsi à milità pè u vultà di u trenu in Piaghja Orientale, sin’à in Portivechju o Bonifaziu.
U ritornu di u trenu, quessu sì chì l’annunziu averia a so carica di prugressu. À prò di l’ecunumia turistica, chjaramente. Ma u più per facilità a circulazione, chì ghjè l’assu Bastia-Portivechju à suppurtà u trafficu automobile u più pisiu di Corsica. U ritornu di u trenu, seria in favore di u circondu è di a calata di l’accidenti : serianu tante vitture di menu nant’à u stradone. Ultimu argumentu di i prumutori di issu prugettu (iè, esistenu. In u mondu sindicale per u fattu): a ricustruzione di u caminu di ferru costeria assai menu chè a cuntinuazione di a doppia strada rapida, prevista sin’à u sud estremu di l’isula.
Allora, u trenu di Portivechju, sognu o realità ?
Ci n’anu da vulè mosse, puesie è canti…