Masai: Marcandria, Petrusimone è a matematica
Più studieghji è più scimisci
Lascia corre Marcandria
Stà à sente à Petrusimone
Ùn ci pensà più à quessa
Si n’hè andata
Bon’ viaghju
Ne truverai una altra ne truverai
Ma chì cerchi à capì u perchè è u cumu
Chì studieghji o Marcandrì
Si ne andata è basta
Chì studieghji...
Più studieghji è più sai
Và bè
Ma più sai è più ti scordi
Più ti scordi è menu sai
Dunque
Più studieghji è menu sai
Ghjè matematica
Ùn poi andà contru à a matematica
Stà à sente à unu ch’ùn ci capisce
A poi ancu piglià à l’aritrosa
Hè listessa
Perchè chì…
Menu studieghji è menu sai
Và bè
Ma menu sai è menu ti scordi
Menu ti scordi è più sai
Dunque
Menu studieghji è più sai
Ghjè un teorema ficaghjacciu
Stà à sente à unu ch’ùn vede più u pelu in l’ovu
Ùn ci hè tantu à capì
Perchè chì...
Più capisci è menu ci hè da capì
Menu ci hè da capì è menu cerchi à capì
Menu cerchi à capì è menu capisci
Dunque
Più capisci è menu capisci
Ti ghjoca contru a matematica o Marcandrì
Ùn vale à torce u nasu.
Stà à sente un scemu
Iè un scemu. Sappia chì…
Più si scemu è menu ai logica
Menu ai logica è menu ci hè da scimì
Chì sì scemu digià
Menu ci hè da scimì è menu scimisci
Dunque
Più si scemu è menu scimisci
Face chì...
Femu i conti di tuttu
Più studieghji è menu sai
Menu sai è menu scimisci
Aiò ch’ùn sì solo o Marcandrì
Ma a matematica ci ghjoca contru
Stà à sente à Petrusimone...