L'horosch'ti de José Ambre

BELIER, t’ as tout chou qui faut aujord’hui pou’ réussir tout chou qu’ te veux interprinde … El toute, ch’ est d’ tout faire bien dins l’ ordre, si qu’ te boutonnes lundi aveuc mercredi,  te vas vas faire des éfants sins cul pour aller à l’ école sins marronnes… !   

TAUREAU, ch’ est du côté ed’ tes z’ amours equ’ te vas sauter à l’ clinche, ti, …Alorss, mets un carré blanc à t’ farniette et n’ ouvre à parsonne… cha évit’ra les infarctus…    

GEMEAUX, y-a rin qui va mal , et in peut même dire equ’ cha s’améliore au sujet d’ tes z’amours, mais bon,  ress’ quand même su l’ qui vive…in n’ sait jamais… !   

Ti, CANCER, t’ as eune grande invie de t’ détinde, et y-a rin qui va t’ in impêcher… à ti l’ grand air et la campane… mais bon, ch’ seul’mint valape pour el’ Nord, la Somme, l’ Aisne et l’ Oise, pour ech’ Pas d’ Calais, rien à vire, restez couqués, papattes in rond su ch’ canappé…

Ti, LION, te vas t’ faire vire sous tin plus bieau jour…Attintion les yus, cha va querre comme des mouques… ! 

Pour ti,  m’ tiote VIERCHE, y-a rin qui va mal, mais ress’ quand même su’ tes gardes, in pourrot bin t’ cacher des m’noulles pour des queues d’ chériches… !

BALANCHE, t’as eune invie de sortir qui t’ prind comm’ eune invie d’ picher… en’ t’ artiens point… l’une comm’ l’aute, cha fait du bien par ed’dù qu’ cha passe … Comme toudis : Pas d’ Calais s’ abstenir… !

Par contre, ti, SCORPION, te n’as point envie d’ mette tin nez déhors… Bon, bin, si ch’est comm’ cha,  ress’ à jouque au cuin d’ tin fu … un poucheau qui fait à s’ mode, ch’ est l’ mitant de s’nourriture …!

    SAGITTAIRE, te pètes el’ fu et te vas  intraîner tout tin monde dins eune grande farandole printanière… sauf dins l’ pas d’ calais, ou eune farandolle au grand air pourrot coûter fort cher… !    

CAPRICORNE, et’ jornée all’ va t’ête faite que d’ patienche et d’ corache …Et si qu’ te tiens comm’ cha tout l’ jour, cheulle récompinse all’ va point t’ête longue à vénir… !

Fais attintion à tout quo qu’ té dis VERSEAU … Vaut miux parfos s’ taire que d’ mal parler, cha évite les cacoulles….

Et infin, PICHON, ch’ est grâce à t’ volonté d’ infer equ’ té vas t’ sortir d’ eune méquante ornière… Chou qui va t’ faire admirer par tous tes gins… i n’aront d’ yus qu’ pour ti tout l’ jour… !