Fatasöfnun og Rauðakrossbúðir
- Endurnýtt líf - tískutímarit Rauðakrossbúðanna
- Afgreiðslutími Rauðakrossbúðanna
- Vefverslun Rauðakrossbúðanna
- Móttökustaðir
Rauði krossinn á Íslandi tekur á móti fatnaði um allt land í þartil gerðum gámum. Rauði krossinn úthlutar einnig fatnaði til einstaklinga sem á þurfa að halda auk þess að selja fatnað í verslunum sínum víðsvegar um landið á góðu verði.
Rauði krossinn úthlutar fatnaði til 1.500 einstaklinga á Íslandi á hverju ári en skjólstæðingar Rauða krossins erlendis njóta einnig góðs af fataverkefninu.
Fatasöfnun Rauða krossins er eitt mikilvægasta fjáröflunarverkefni Rauða krossins á Íslandi. Afrakstur af söfnuninni fer til reksturs Hjálparsíma Rauða krossins 1717, hluti til verkefna deilda félagsins um land allt og hluti nýtist til hjálparstarfs erlendis.
Verslanir Rauða krossins gegna mikilvægu hlutverki í fjáröflun félagsins. Fyrsta búðin var opnuð árið 2000 á Hverfisgötu í Reykjavík en tveim árum síðar flutti hún starfsemina að Laugavegi 12 þar sem hún er enn. Verslanir á höfuðborgarsvæðinu eru fjórar. Tvær á Laugaveginum, ein í Mjóddinni og ein í Kringlunni.
Einnig eru búðir á Akureyri, Húsavík, Borgarnesi, Eskifirði, Egilsstöðum, Stöðvarfirði og Hornafirði.
Á þriðja hundrað sjálfboðaliða starfa í búðunum og skila um 1.900 vinnustundum á ári. Reikna má með að framlag þeirra sé ekki undir 30 milljónum króna.
Fatasöfnun stendur og fellur með dyggum stuðningi Eimskipa – Flytjanda, Sorpu og þeirra hundruð sjálfboðaliða sem prjóna, sauma, flokka, pakka og standa vaktina í Rauðakrossbúðunum allan ársins hring.